Bungbong sa selda sa Talisay nalungag, gitaptapan na lang og karton sa priso

Bungbong sa prisohan sa Talisay nga naa mahimutang sa city hall sa barangay Lawaan gilungagan sa piniriso. Ang insidente nahibaw-an sa mga jailer niadto lang Domingo.

Tungod sa pagdili og pasulod og sigarilyo ngadto sa maong prisohan hinungdan nga mipahigayon og inspection ang mga jailer pagpiho kun wala bay mga sigarilyo nga gitagoan ang mga piniriso.

Airconditioned ang nahisgutang detention cell ug mahuom ang baho sa sulod kun dunay manigarilyo.

Apan imbes sigarilyo ang makit-an sa maong mga jailer lungag man hinuon sa bungbong dapit sa wala nga bahin sa detention cell nga gitaptapan na lamang og karton sa mga piniriso.

Matud pa sa usa ka jailer nga si PO1 Alan Villasurda nga si Ryan Campo napriso sa kasong pagpangawat kinsa gibalhin na ngadto sa city jail sa Maghaway sa milabay'ng semana maoy gitumbok sa mga kanhi kauban niining piniriso nga maoy mihinay-hinay og lungag.

Niadtong milabay'ng tuig adunay usa ka piniriso sa maong prisohan nga nakaikyas apan demalas kini tungod kay nasikop pagbalik sa mga istambay ug gitugyan ngadto pagbalik sa mga polis.

Ang nahisgutang piniriso miguba sa exhaust fan diin didto siya miagi sa iyang pag-ikyas.

Si Bise Mayor Aberdovey Belleza nagkanayon nga giawhag niya ang city engineering nga mopahigayon og inspection ngadto sa prisohan ug usbon ang desinyo niini ug palig-onon ang mga bungbong.

Mikabat sa 18 ka piniriso ang nadetiner karon diha sa Talisay detention cell.