Ate Glo pangitaan sa iyang saad sa barangay Ermita

Subling mopasar og resolusyon ang konseho sa Barangay Ermita ning dakbayan nga magpahinumdom sa gipasalig ni Presidente Gloria Arroyo sa milabay'ng pagpangampanya niini sa 2004 presidential election.

Gibutyag ni Ermita Barangay Captain Felicisimo Rupinta nga sa ika-upat nga higayon mopasar sila og laing resolusyon atol sa sesyon nila sa konseho sa barangay karong hapon aron pahinumduman si Arroyo sa gipasalig niining luna nga maoy tukoran sa publikong tunghaan sa elementarya diha sa ilang barangay.

Matud ni Rupinta dihang nahinabi sa mga tigbalita sa pagbisita niini sa City Hall kagahapon nga kinahanglanon kaayo ang maong tunghaan sa mga kabus nga tinun-an sa ilang lugar nga pagkakarun atua magtunghaan sa mga kasikbit nga barangay.

Matud ni Rupinta dunay kapin sa 1,700 ka mga tinun-an sa elementarya sa ilang lugar ang atua magtungha sa City Central School, dunay kapin sa usa ka gatus ka tinun-an ang atua magtungha sa Pasil Elementary School ug laing kapin sa 20 ka tinun-an atua magtungha sa Regino Mercado Night High School sa Pahina Central.

Gitug-an sa kapitan nga gikan niadtong tuig 1960 hangtud karon dunay 17 na ka mga tinun-an ang naligsan sa dalan samtang nagpaingon nga motungha ug ang katapusan niini mao ang usa ka tinun-an nga naligsan patay duha ka bulan na ang nakalabay.

Nagkanayon ang kapitan nga ang luna na lang sa nasudnong kagamhanan nga gipasalig sa presidente nga nahimutang sa habig sa reclamation sa barangay ang gipaabot karon nilang mahingpit sa pag-donar aron maoy tukoran sa ilang tunghaan.

Kini human mipasalig na sab si Mayor Tomas Osmeña nga mohatag og P17 milyones nga gahin alang sa pagtukod ug mga edipisyo sa maong tunghaan.