3,000 marijuana

Kapin tulo ka libong punuan sa marijuana ang nadiskubrehan sa kapolisan diha sa lain na usab nga bukirong barangay sa lungsod sa Balamban niadtong nakalabay'ng Huwebes sa buntag.

Ang maong 3,022 ka punuan sa mga hamtong na ug mahimo nang anihong mga marijuana nadiskubrehan sa mga sakop sa 703rd Provincial Mobile Group pinanguluhan ni Insp.Jovito Atanacio nga nagbase sa naasoy'ng lungsod.

Gawas sa mga naibot duna pay 50 ka semilya sa maong tanom nga gituohang giandam na isip ipuli sa mga hamtong nga marijuanang anihonon na apan ang kapolisan walay nasikop bisan usa ka mag-uumang nananom niini.

Si Sr.Supt. Drusillo Bolodo ang direktor sa Provincial Police sa nauna nang pakighinabi sa Banat News nagkanayon nga mas gipili karon sa mga mag-uuma ang pagtanom og marijuana kaysa sa ordinaryong pananom gumikan sa kadako sa abot niini ug pabor usab sa ilang lugar.