Konduktor gipusil, tipi

Patay ang usa ka kundoktor human kini pusila sa gituohang pasaherong iyang gikalalis nga wala gani mosakay apan miatang hinuon sa ilang pagbalik diha sa eskina sa dalan Gorordo ug Archbishop Reyes Ave. barangay Camputhaw ning dakbayan niadtong milabay'ng gabii.

Usa ka bala diha sa likod maoy nakaingon sa kamatayon sa biktimang si Danilo Tagunon,alyas Totoy,25, kundoktor ug molupyo sa sitio Opra barangay Kalunasan ning dakbayan.

Base sa gihimong imbestigasyon sa kapolisan sa sayo pa ang biktima uban sa drayber nga si Reynaldo Escopite Gimenez namasahero ug ang suspek maoy usa sa mga gitawag sa biktima kinsa gikatahong naglingkod daplin sa dalan.

Giingong dunay nahitabong panaglalis tali sa biktima ug sa maong tawong iyang gikaway hangtud nga mibiya nalang sila palayo sa lugar ug mipadayon sa biyahe padulong sa downtown area.

Wala damha sa biktima nga ang maong tawong iyang gikalalis nagpaabot diay gihapon kanila ug dihang sa pag-agi na nila kalit gipusil si Tagunon diha sa likod dayong ikyas sa dapit.