Gipusil atubangan sa iyang pamilya

Usa ka mamuhatay og sapatos gipusil patay atubangan sa iyang pamilya niadtong milabay'ng gabii sa Sitio Tubod, Barangay Villadolid lungsod sa Carcar.

Ang biktima mao si William Lanas, 39 anyos, kinsa molupyo sa nahisgutang dapit.

Sa pasiunang imbestigasyon sa kapolisan sa lungsod sa Carcar, si Lanas nanihapon uban sa iyang pamilya ug kalit lang nga miabot ang suspetsado nga nailang si Christopher Sato, silingan ra usab sa biktima ug dayong pamusil sa makatulo ka higayon.

Si Lanas nakaangkon og samad pinusilan sa walang bahin sa iyang ulo ug dali kini nga gidala sa Carcar District Hospital apan matud pa sa mananambal nga miatiman, patay na kining midangat sa maong tambalanan.

Gisusi pa karon sa kapolisan ang motibo sa maong pagpamusil tungod kay wala makakita ang kabanay sa biktima sa posibleng hinungdan sa pagpamusil.

Kasamtangan usab gipangita sa kapolisan ang mamumuno sanglit dali kining naka-eskapo human sa maong insidente.

Ang kapolisan sa Carcar miklaro nga walay kalabotan sa giingong vigilante killing ang pagpatay ni Lanas.