Mga polis nga ilabay nagyawyaw

Nagbagolbol ang pipila sa pito ka polis sa Talisay City nga gitangtang sugod niadtong Miyerkules sa ilang puwesto gumikan sa taho nga midawat silag P150,000 gikan sa usa ka suspetsadong negosyanteg ilegal nga drugas.

Kini sila mao si PO1 Archimedes Judilla, PO3 Ramil Navarro, SPO3 Ederick dela Cruz, PO3 Remberto Empeynado, PO3 Alexes Racaza, PO1 Marcilin Parayday ug SPO4 Reynaldo Vitualia.

Usa sa maong mga polis nga wala magpahingalan nagbagolbol tungod sa kapakyas sa ilang mga kadagkoan sa pagpaminaw sa ilang bahin.

Kini samtang lig-on nilang gipanghimakak ang pasangil nga midawat silag kuwarta nga suborno gikan kang Edna Cabo kinsa ilang gidapit og gisukitsukit hangtod nga gipaslak nila sa prisohan sa Lawaan Police Substation niadtong Hulyo 1.

Gipasanginlan silang ila lang usab nga gipagawas si Cabo nga wa magpahibawo sa ilang hepe nga si Supt. Audie Villacin.

Ang napungtan ni Villacin sa sayo pa mao ang giingong kapakyas sa maong mga polis pagtala niini sa blotter.

Wala usab mopahibawo kaniya nga nakadakop silag usa ka suspetsadong negosyante sa ilegal nga drugas.

Kini human sa giingong nasikop si Cabo pinaagi sa usa ka buy-bust operation sa kapolisan nga hingtungdan.

Apan matud pa sa maong mga polis nga walay buy-bust operation nga nahitabo.

Ang pagdapit nila kang Cabo, gihimo tungod kay matud pa naa kini sa listahan sa mga negosyanteg shabu diha sa Talisay nga gikoptan sa kapolisan.

Ang blotter sa kapolisan sa Lawaan nagbutyag nga gipagawas si Cabo pinaagi ni PO3 Ramil Navarro.

Ang misaksi ug mipamatuod niini mao si Inspector Isagani Abalo hepe sa Lawaan Police Substation.

Si Villacin nahingangha dihang giimbistigar siya sa ilang hepe sa kapolisan sa lalawigan tungod kay wa siyay kasayoran sa maong hitabo.