Jailguard gipakaon sa eskapo

Init nga sabaw sa manok bisaya ug tinolang isda maoy nakaingon sa pagkalipat sa usa ka jailguard hinungdan sa pag-eskapo sa suspek sa pagpanulis ug pagpanglugos sa usa ka maestra niadtong Pebrero tuig 2004.

Ang puganteng si Rogelio Purto, 29, kinsa nasikop pagbalik sa grupo ni Insp. Conrado Manatad ang hepe sa Argao Police nagkanayon nga didto lang siya sa bukirong bahin sa naasoy'ng lungsod ug milugsong lang niadtong Miyerkules gumikan sa iyang kamingaw sa ginikanan.

Si Purto sa pakighinabi sa Banat News nagkanayon nga napugos siya sa pag-ikyas kang JO1 Mark Along sakop sa Cebu Provincial Detention and Rehabilitation Center gumikan sa pagpanghulga niini ngadto kaniya niadtong Septiyembre 21, 2004.

Matud pa ni Purto nga dihang giiskortan siya ni Along diha sa sala ni Judge Maximo Perez sa RTC branch 26 sa lungsod sa Argao nagpakuyog si Along ngadto sa kasilyas kay buot kining mangihi.

Apan nakugang nalang siya dihang gikatahong gitiunan siyag kalit ni Along sa kalibre 45 pistola niini ug giingnan nga dili siya paikyason kay wala siya masuhito sa habagatan.

Human sa iyang bista gihaylo ni Purto si Along nga maniudto didto sa ilang balay, tuod man mikuyog kini sa Sitio Media Barangay Poblacion, Argao diin giandaman sila og init pa kaayong sabaw sa manok bisaya ug tinolang isda.

Matud pa ni Purto nananghid siya kang Along aron mangihi ug giingong gitugtan siya niini nga walay langay samtang kini nalingaw og sigop sa sabaw. Nianang tungura nakaikyas gyud si Purto pangadto sa bukid