Ex-convict gitangkugo pagpusil

Patay diha-diha ang usa ka ex-convict human kini gipusil sa tangkugo iyang silingan samtang nagduwa og video machine kagahapon sa kaadlawon diha sa Sityo Cambuntan, barangay Bulinawan lungsod sa Carcar.

Ang biktima mao si Cesar Malabad, 37 anyos, residente sa maong lugar nakaangkon og usa ka samad pinusilan sa iyang tangkugo.

Sumala pa ni SPO1 Joel Pananganan desk officer sa kapolisan sa Carcar nga ang biktima dunay kaso nga frustrated murder adtong 1990 diin nasang-at na kini sa Regional Trial Court niining dakbayan.

Si Erminda Balabad inahan sa biktima mitumbok ni Gary Baradan hingkod ang panuigon nagpuyo usab sa nahisgutang lugar nga maoy suspetsado sa pagpamusil apan ang gitumbok wala na diha sa ilang lugar.

Giingong ang biktima ug suspetsado duna daan nga panagbangi tungod kay pipila ka adlaw sa wala pa mahitabo ang insidente gigukod sa biktima ang suspetsado.

Ang kapolisan sa Carcar mipahigayon karon og follow-up nga imbestigasyon sa nahisgutang hitabo.