Kandila miugdaw sa balay

Kandilang gigamit sa usa ka 7-anyos nga bata nga nagtuon maoy nakaingon sa pagkaugdaw sa balay sa apohan niini niadtong Martes sa gabii diha sa barangay Poblacion West lungsod sa Moalboal.

Naugdaw ang balay ni Cristita Gabato human biya-i sa iyang apo ang kandila nga nagsiga nga gigamit niining suga sa pagtuon, apan nakatulog kini ug nakalimtan ang upos sa kandila nga midukot sa amakan nga bungbong.

Matud pa ni SPO2 Albert Gregia nga ang bata nakatulog kini human og tuon sa iyang mga leksiyon og gibalhin sa inahan niini nga si Puring Gabato didto sa kusina.

Mao na lay namat-an ni Puring ug sa anak niini nga midilaab na ang sulod sa balay ug naglumba kini sila og panagan lakip na si Cristita aron pagsalbar sa ilang kinabuhi.

Mikabat sa P70 mil ang danyos sa nahisgutang sunog diin ang pamilya Gabato wala gyuy napunit nga mga kabtangan.