Samdan nga gidala sa iyang mga barkada ngadto sa Perpetual Soccour Hospital ang biktimang si Franz Cabasag,17, tinun-an sa University of the Visayas sa kursong Criminology ug nagpuyo sa Villa Leyson Barangay Bacayan ning dakbayan.
Base sa gihimong imbestigasyon sa Homicide Section ang biktima kasamtang nakigtabi sa iyang mga barkada nga diha sa maong dapit dihang nakadungog sila og upat ka sunod nga buto sa armas de fuego.
Dihadiha dayon mibati og panghawoy sa iyang tuong sampot si Cabasag ug nasutang duna diay siyay igo diha sa maong parte sa iyang lawas ug daling gidala sa iyang higalang si Raymund Benju Conde Labra sa tambalanan.
Sa gihimong follow-up sa Homicide Section nasutang atol sa pagkahitabo dunay usa ka pick-up type nga multicab ang paspas nga misibat sa lugar ug gidudahang didto magluwan ang nagpataka og pamusil ngadto sa grupo sa biktima.
Wala pa masuta kun may kalambigitan ba sa panagribal sa fraternity ang insidente.