Namaligya'g pekeng bino gisikop

Nasulod sa laang ang usa ka gidudahang mangingilad kinsa nailad sad sa mga polis dihang gi-orderan kini pag-usab sa mireklamong kustomer nga iyang nailad sa gibaligyang peke nga bino.

Ang suspek natanggong na karon sa karsel mao si Rodrigo Edorbo Delegado, 47, minyo ug molupyo sa dalan T.Padilla Barangay T. Padilla ning dakbayan human siya ireklamo sa giilad nga si Sheryl Osmeña Boromeo,30, minyo ug molupyo sa dalan Don Ramon Aboitiz barangay Capitol Site ning dakbayan.

Si SPO3 Edelberto Solis sa Fuente Police Station mibutyag sa Banat News nga kining modus-operandi ni Delegado mao ang pagtimpla og binong baratuhon ug adto isulod sa mahalong botelya sa mga ilimnong makahubog nga mao usab iyang ibaligya sa makatintal kaayong presyo.

Gikatahong gihaylo ni Delegado si Boromeo sa pagpalit sa iyang gibaligyang excess sa "palusot" sa Customs nga upat ka botelyang tequila sa kantidad nga P1,000.

"Excess kuno to sa gipalusot diha sa Customs, mipalit sad tawon siya kay barato raman, pagtan-aw ron sa uyuan kay Tan_ _ _ man diay ang sulod," asoy pa ni Solis.

Si Boromeo kinsa nadala sa diskarte ni Delegado mibayad og usa ka libo ug gidala pauli ang upat ka botelyang Jose Cuervo Especial Tequila, diha kini masakping peke gumikan sa giingong pagtilaw sa uyoan sa biktima usa ka lokal nga bino diay ang sulod niini ug dili ang tequila.

Nianang tungora si Boromeo nangayog tabang sa kapolisan maong gipaunhan kini sa mga polis pinanguluhan ni SPO2 Elpidio Manto, si Boromeo miorder pagbalik og laing upat ka botelyang tequila sa samang presyo. Tuod man mipakita ang suspek diha sa Raintree Mall diin sila magsabot.

Didto wala na kaugpo ang suspek sa mga polis ug nakuhaan pag-usab sa upat ka botelyang gi-order ni Boromeo ug laing usa ka botelyang gidudahang peke usab nga Johny Walker nga bino.

Ang suspek gikatakdang pasakaan og kasong pagpangilad ug paglapas sa balaod sa patigayon.q