Presidente sa taugamma girakrakan sa nag-bonnet

Batan-ong gikatahong chapter president sa Tau Gamma Phi didto sa lungsod sa Cordova gikaliguag bala sulod sa gipasilungang tangkal sa baboy diha sa Sitio Karahay Barangay Gun-ob dakbayan sa Lapu-Lapu niadtong Sabado sa gabii.

Patay gumikan sa daghang igo sa bala diha sa ulo ug sa lawas ang biktimang si William Taruca Anlucutan,19, ulitawo ug molupyo sa Barangay Cogon lungsod sa Cordova.

Si PO3 William Homoc sa Lapu-Lapu City Police Homicide Section mitug-an sa Banat News nga kasamtangang nag-inom samtang nagpasilong sa ulan diha sa abandonadong tangkal sa baboy ang biktima uban sa duha ka mga ka-brod niini nga sila si Lester Ouano ug Ariel Ondoy dihang nahitabo ang pagpamusil.

Giingong usa ka wala mailhing lalaki ang milipot sa ilang luyo nga nagsuot og bonnet, itom nga t-shirt dayong kalit nga mirakrak kanila og gituuhang sub-machinegun type nga armas de fuego.

Gikatahong didto tanan tumong kang Anlucutan ang bala hinungdan sa daghang igo sa lawas ug ulo niini nga maoy hinungdan sa hinanali niining kamatayon.

Katorse ka mga basiyo sa kalibre 9 mm nga bala ug duha ka slugs ang nakuha sa mga imbestigador diha sa crime scene.

Midugang si Homoc nga posibleng may kalambigitan ang panagribal sa fraternity ang hinungdan sa pagpatay apan wala pa matino kun unsang grupoha.

Ang Tau Gamma Phi kanunay ng malambigit sa panagrambol sa higpit nga karibal nga grupong Alpha Kappa Rho kaniadto pa.