Substandard appliances mikatap sa siyudad

Na-alarma ang mga opisyal sa siyudad sa Sugbo ning pagkatap karon sa mga substandard nga appliances ug mga kagamitan sa mga lain-laing katindahanan dinhi sa dakbayan nga piligrong makamugna og aksidente ilabina sa sunog diha sa tagsa tagsa ka pinuy-anan.

Kini tungod kay ang maong mga butang nga sagad gipamaligya dinhi sa dakbayan gituohang wala kini makapasar sa Philippine Quality Safety Standards.

Tungod niini mopasar ug resulosyon ang tsirman sa committee on commerce trade and industry sa siyudad konsehal Arsenio Pacana nga magmandu sa Department of Trade and Industry kon DTI pagpahigayun ug subsub nga pakisusi batuk ning nahisgutang mga katindahanan.

Matud sa konsehal daghan usab ang mga mopalit ning maong mga baligya ilabina kay mas barato ang presyo niini kon itandi niadtong ubang mga establisamento nga namaligya usab sa susamang mga butang nga nag-agi ug misunod sa tukmang proseso.

Gi-awhag sa konsehal ang DTI-7 nga palig-onon ang pag-protihir sa siguridad sa publiko batuk ning mga barato apan daling maguba ug piligro pa gyud sa sunog nga mga butang.

Gibasihan sa konsehal ang balaod sa consumers welfare act ug sigurohon nga mapatuman ug mosunod sa mga tukmang proseso ang tanang mga establisamento nga ania mag-negosyo dinhi sa dakbayan sa Sugbo.