SWAT nanghinol sa misis sa polis

Sakop sa Special Weapons And Tactics (SWAT) sa Cebu City Police Office positibong giila sa gihimong police line-up sa ginang nga mireklamong mihinol sa pribadong parte sa iyang lawas samtang siya nagbantay sa banang polis kinsa gipriso diha sa karsel sa Mobile Patrol Group.

Si SPO1 Dennis Sosmeña ang team leader sa Team 4 sa SWAT positibong gitudlo ni Ruby Dino asawa ni PO1 Wenceslao Dino nga kasamtangang gibilanggo gumikan sa pag-hostage sa usa ka jailguard dili palang dugay.

Si SPO4 Felix Bihay ang Chief Investigator sa Internal Affairs Service (IAS) mitug-an sa Banat News nga positibong giila ni Ruby ug sa testigong kauban niini si Sosmeña nga mao ang tawong mihinol kaniya niadtong gabii sa Hulyo 24 nga iyang nakit-ang nakauniporme og SWAT.

Niadtong higayuna ang six-man SWAT team 4 maoy naka-duty maong sila maoy gipa-police line up, si Sosmeña matud pa ni Bihay kusganong mihimakak sa pasangil kay matud niya nagpahulay na siya nianang mga orasa.

Sigun pa ni Bihay posibleng pasakaan og kasong kriminal ug administratiba si Sosmeña kun kabubut-on sa biktima, apan sa pagkakaron ang IAS maoy mohimo na og imbestigasyon sa kaso.