Bag-ong police HQ tukoron sa siyudad

Magtukod og bag-ong headquarters ang kapolisan sa dakbayan sa Sugbo nga gitumong aron paghatag og kasayon sa publiko nga makadangop ug makasumbong sa ilang mga reklamo.

Human sa tigum sa Police Coordinating and Advisory Council (PCAC) gipadayag ni Bise Mayor Michael Rama nga kini maoy ilang gikasabutan sa maong tigum uban kang CCPO acting Chief Supt. Melvin Gayutin.

Gipahibalo usab ni Rama nga gi-aprobahan ni PNP chief Arturo Lomibao atol sa pagbisita niini dinhi sa Sugbo sa milabayng adlaw ang hangyu nga pundo sa siyudad alang sa maong katuyo-an.

Gitug-an ni Rama nga P5 milyones ang unang giaprobahan ni Lomibao sa pagbisita niini dinhi sa Sugbo ug nipasalig pa kini nga modugang og P2 milyones alang sa gastuhan sa kontruksiyon sa maong edipisyo niini,.

Gitahasan sa Bise mayor si Konsehal Augustus Jun Pe ug ang tsirman sa committee on Police Konsehal Procopio Fernandez nga maoy mangita og available nga luna sa dakbayan diha sa may North Reclamation Area nga maoy mamahimong katukoran sa bag-ong buhatan sa CCPO.

Matud ni Rama napilian niya ang maong lugar gumikan kay mas sayon ang maong dapit paingon sa South Reclamation Project (SRP) ug ngadto na sa Carbon ug natunga gyud kini sa naglibot nga onse ka mga presinto sa kapolisan dinhi sa siyudad ug mga special unit.