Tomas mibasul sa LBP

Gibasol ni Mayor Tomas Osmeña ang pagpabaya ug lugak nga seguridad sa Land Bank of the Philippines hinungdan nga subli kining nabiktima sa pagpanulis ang sangang buhatan niini sa Bogo niadtong Martes sa gabii nga nawagtangan og kapin sa P9 milyones nga kantidad.

Atol sa press conference ni Osmeña kagahapon sa udto gipadayag niini nga kulang siya og pagtuo nga mga professional ang mga suspek nga mitulis sa maong bangko gumikan kay sayod siya nga lugak ang seguridad sa maong bangko ug bisan mga sakop lang sa ordinaryong boy scout makasayonsayon og tulis sa maong bangko.

Gibasehan sa mayor ang milabay'ng tulis sa P. del Rosario Branch sa bangko niadtong Agosto 2003 nga yano ra kaayung misakiyo ang mga tulisan sa P11 milyones nga pundo sa maong bangko sulod lang sa pipila ka minutos.

Gisaway ni Osmeña ang pagpabaya sa maong bangko ilabi na ang kapakyas pagpa-ubos og subsob nga pagbansaybansay sa mga security guard niini nga nahibaw-an sa mayor nga dili gani makamaong mogamit sama sa pagpabuto sa ilang service firearms.

Gihulagway sa mayor nga mga tanga' ug danghag ang mga kawani ug management sa maong bangko nga bisan ug nasayod na nga dili lig-on ug luwas ang seguridad sa maong bangko mokompiyansa lang gihapon sa pagbutang sa ibabaw sa ilang lamisa sa mga minilyon nga kantidad sa kuwarta.

Alang sa mayor walay angay'ng basulon sa maong pagpanulis nga nahitabo kun dili ang management ra mismo sa maong bangko gumikan kay bisan giunsa kini niya og pahimangno pipila na ka higayun pabilin gihapon kining nagpabaya ug wala mohatag og importansiya.

Gisalikway ni Osmeña ang posibilidad nga dunay grupo sa mga sindikato sa pagpanulis og bangko nga nakasulod dinhi sa Sugbo ug maoy nanulis sa maong bangko didto sa Bogo.

Gitakdang ipa-ubos sa lie detector test ang duha ka mga gwardiya sa LBP-Bogo nga sila si Henry Cuerda ug Rogelio Baterna ug ang lima ka mga kawani sa bangko nga diha sa buhatan dihang mitumaw ang maong pagpanulis.