Lalaki gitigib, patay

Gisusama'g kahoy ang usa ka lalaki dihang gitigib siya hangtud mamatay sa iyang silingang karpentero diha sa Barangay Pandacan lungsod sa Pinamungahan niadtong milabay'ng Lunes sa buntag.

Nabulit og samad dinunggaban sa dughan ug liog ang biktimang si Barabay Abrigo, 41, minyo, ug molupyo sa maong lugar dihang gitigib siya sa iyang silingang si Renato Rubahib,33, ulitawo ug usa ka karpentrero sa konstruksyon.

Sigun pa ni PO1 Dominic Pantajo sa Banat News ang biktima kasamtangang naglakaw diha sa may sam-ang sa Pandacan dihang kalit nga gibabagan sa suspek kinsa dugay nang nagpaabot kaniya diha sa maong lugar.

Way daghang pangutana kalit kining gidugsak og tigib sa liog ang biktima dayon giusban kini pagdunggab diha sa dughan lima ka higayon ug usa sa walang kiliran sa lawas hinungdan sa hinanali niining kamatayon.

Matud pa ni PO1 Pantajo ang namatay base sa alegasyon sa suspek kanunay nga mopasingit kaniya ug gituohang wala na makaagwanta ang suspek gibaslan kini niya.

Ang suspek malinawon hinuong mitahan sa iyang kaugalingon sa kapolisan human sa insidente ug mitug-an duna silay dugay nang gipanagbangian.