Gipasidunggan

Tagbilaran City -Nakadawat og pasidungog ang kapolisan sa probinsya sa Bohol gumikan sa kalampusan nga nahimo niini pagsangyaw sa mga programa nga gipatuman sa kapolisan sa tibuok nga rehiyon.

Si Police Senior Inspector Expedita Sales sa Bohol Provincial Police Office maoy midawat sa maong pasidungog human usab sila makita nga ang Police Community Relations Office malampuson sa ilang kalihokan.

Ang paghatag sa pasidungog maoy kabahin sa pagsaulog sa Police Community Relations Month sa miaging buwan.

Si Bise Mayor Michael Rama sa dakbayan sa Sugbo nga maoy pinasidunggang dinapit atul sa maong kalihukan miingon nga dako gayud kaayo ang tahas nga gisangon ngadto sa kapolisan pagpatuman sa kahusay ug kalinaw.

Matud pa ni Rama nga ang gimbuhaton sa kapolisan dili lang ang pagpanakop niadtong mga badlungon sa katilingban kon dili paghimo usab og lakang aron pagpamenus sa krimen.

Si Chief Superintendent Eduardo Gador, hepe sa kapolisan sa tibuok Central Visayas misanong sa pamahayag ni Rama.

Gitataw hinuon ni Gador nga nagkinahanglan usab sila og tabang gikan sa komunidad aron sa ingon magmalampuson sila sa ilang gimbuhaton paghatag og proteksyon sa katawhan.