Kundoktor gipusil sa lalaking mipara

Usa ka konduktor sa PUJ ang gipusil sa nagpakaaron-ingnon nga pasaherong lalaki nga nag-atang niini niadtong miaging gabii didto sa Estaca sa lungsod sa Compostela , Cebu.

Ang biktima mao si Francisco Cal, 22 anyos, ulitawo nga nagpuyo sa sitio Pilit sa barangay Cabancalan, sa Compostela.

Dali nga gidala sa tambalanan tungod sa duha ka mga samad sa bukobuko ug bukton ang biktima.

Sumala pa nga nagpanawag og pasahero ang biktima ug ang wala mailhing mamumuno nga nag-atang sa daplin sa karsada misinyas usab sa pagpara.

Gihunongan kini sa drayber sa pagtuo nga mosakay apan dihang nakalipot na ngadto sa luyo sa PUJ, giduol ang konduktor ug gidul-itan sa pagpusil sa bukobuko.

Dali nga mipahilayo ang wala mailhing lalaki ug ang biktima nga nahagba sa daplin sa karsada dali usab nga gikarga sa drayber ug gihatod sa Vicente Sotto Memorial Medical Center sa dakbayan sa Sugbo.

Nagtuo ang kapolisan nga ang nagpusil sa biktima mao usab ang wala mailhing lalaki nga gikalalis sa biktima sa miaging adlaw tungod sa wa pagkasinabtanay sa gikolekta niining plite.