7 anyos gilugos gidakdakag bato

Gidakdakag bato human lugosa ang usa ka 7 anyos nga batang tinun-an sa elementarya nga napalgang patay diha sa Sitio Catadman Barangay Sabang dakbayan sa Danao kagahapon sa buntag.

Kini maoy gitug-an ni SPO2 Edgar Gomez sa Banat News atol sa pakighinabi kagahapon. Matud pa niya ang biktima giilang si Rhea 7, molupyo sa Almendras St. Barangay Poblacion sa naasoy'ng dakbayan.

Gikatahong ang biktima niadto pang gabii sa adlawng Biyernes gipangita sa iyang mga igsoon apan wala kini ma-blotter sa mga ginikanan sa kapolisan.

Kagahapon na sa buntag kini napalgang patay na diha sa kalibunan sa naasoy'ng dapit duha ka kilometro gikan sa ilang tunghaan nga DT Durano Elementary School sa Barangay Poblacion.

Usa ka Pedro Capoy kinsa molupyo sa maong dapit ang gikatahong maoy nakakaplag sa biktima. Wala nay suot sa ubos ang bata ug dunay lama sa dugo ang kinatawo maong nagduda ang kapolisan nga gilugos una kini usa pa patya.

Usa ka dakong bato nga dunay lama usab sa dugo ang napalgan tupad sa biktima nga gituohang maoy gidakdak sa ulo niini.Dako ang pagtuo sa kapolisan nga drug addict ang mihimo sa maong linoog nga krimen.