Misuway og suborno sa polis arestado

Babayeng misuway og suborno sa mga polis sa Waterfront Police Station aron pabuhian ang duha ka mga giingong level two drug pushers gisikop hinoon ug nag-uban na sa mga suspek nga iya untang luwason.

Nagtingkagol hinuon karon sa karsel mao si Josephine Campos,32, minyo taga Ponce Compound Barangay Carreta ning dakbayan kinsa mitunol og kwarta nila ni SPO3 Marciano Sobiono,SPO1 Francisco Balansag ug ang imbestigador sa maong buhatan nga si SPO1 Rene Cerna.

Sigun pa ni Cerna sa pakighinabi Banat News si Campos niadtong milabay'ng gabii mipahigayon og buy-bust operation diha sa Ponce Compound sa Carreta batok sa usa ka Josephine Lariba,47, minyo ug molupyo sa maong lugar.

Si Lariba gidakop human mibaligya og gituohang shabu ngadto sa poseur buyer sa kapolisan samtang laing gidudahang drug pusher nga nakit-ang namaligya usab og shabu nga si Mira Masong Capuyan ,37, minyo ug molupyo sa maong lugar ang gidakop usab.

Si Capuyan sa sayo pa samtang gipaabot nga madakpan si Lariba gikatahong nakit-an usab nga mibaligya og gidudahang shabu sa mga tawong miduol kaniya, nakuhaan siya og duha ka paketeng may sulod nga shabu, samtang si Lariba nakuhaan usab og tulo ka medium size nga paketeng may sulod nga gituohang shabu.

Matud pa ni Cerna dangtan pila ka oras human nila dad-a si Lariba ug Capuyan diha sa ilang buhatan miabot si Campos ug mihaylo kanila og P130 mil nga suborno bugti nga buhian lang si Lariba.

Gikatahong wala kini panumbalinga sa mga polis hangtud nga mibiya nalang si Campos, apan niadtong pagkahapon sa milabay'ng Biyernes gikatahong mibalik si Campos ug nagdala kini og bulsita.

Diha dayon gikatahong giladlad ni Campos ang kwarta sa atubangan sa mga polis aron suholan ang tulo basta dili lang pasakaan og kaso si Lariba apan nianang tungura giposasan siya sa mga polis ug gibalhog sad sa bilangguan uban sa iya untang luwason.

Si Lariba ug Capuyan gikatahong mga level two drug pushers sa ilang lugar ug dugay nang gipanid-an sa kapolisan.

Kini na maoy ikaduhang higayon ning tuiga nga ang mga polis sa Waterfront Police Station gisuwayan og suborno sa mga gidudahang drug personalities human sila mangadakpi.