Recla survey gibalik

Gipa-survey og balik sa kagamhanan sa siyudad sa Sugbo ang 295 hektaryas nga South Reclamation Project (SRP) nga kabahin sa mga rekisitos nga gipangayo sa DENR aron ma-release na ang gipangayu niini nga titulo sa maong proyekto.

Gipahibalo ni SRP manager Engr. Paul Villarete nga niadtong milabay'ng adlaw pang gisugdan sa mga enhinyero sa siyudad ang survey sa SRP nga gipangulohan sa Geodetic Engineer nga si Edgar Batiquin ug gipaabot nga makompleto na kini karung adlawa.

Gibutyag ni Villarete sa press conference niini kagahapong adlawa nga gihimo nila ang maong pag-pasurvey og balik human mihatag og katungod sa siyudad sa Sugbo ang CENRO nga mopahigayon sa maong survey aron pagtino sa kinatibuk-ang gidak-on ug gilapdon niini.

Ang "authority to survey" ug ang himuon nilang pag-verify niini mao nalay kulang sa onse ka mga rekisitos nga maoy gipangayo sa ulohang buhatan sa DENR una pa aprobahan ni Environment Secretary Mike Defensor ang pagpa-release sa titulo niini.

Matud ni Villarete nga niadto pang tuig 2001 na-survey ang SRP apan subli nila kini karong gipa-survey og balik agi'g pagsanong sa kagustohan sa mga hingtungdang ahensiya sa gobyerno.

Mi-apelar si Villarete ngadto sa mga opisyal sa CENRO ug DENR dinhi sa rehiyon nga pahibaw-on ug iduso na ang tanang mga dokumento alang sa pag-aplay ug titulo sa siyudad sa maong proyekto.

Kini tungod kay matud ni Villarete taas na kaayong panahon nga nagsigi ug bayad ang siyudad sa gi-aplay niini ngadto sa JBIC nga maoy gigastu sa katukoran kaniadto sa maong proyekto apil na ang interes nga gibana banang moabot ug P11 bilyones sa data data nga pagbayad nga ma-impas sa tuig 2025.