4 ka minero natabunan; 1 patay

Upat ka mga minero natabunan, usa kanila namatay dihang nadat-ugan sa yuta nga giaspalto diha sa Sitio Maantud Barangay Dumalan lungsod sa Dalaguete sa miaging adlaw.

Gibasol nga hinungdan sa pagkahulpa sa yuta mao ang padayong pagbunok sa ulan nga nakapahumok sa yuta ug wala na kapugngi sa mga gibangil nga sanga sa ipil-ipil ang coal muck diha sa uluhan sa lungag.

Sa pagkahulpa sa maong minahan si Luciano Villacorta, hingkod ang panuigon maoy natabunan sa bagang coal muck hinungdan sa kamatayon niini samtang nakaangkon usab og mga bun-og sila si Melquiades Ybañez, Violeto Villacorta ug Ronito Amagan.

Ang maong minahan gikatahong gidumala sa Ebalong Resources and Development Corporations nga gipanag-iya karon sa usa ka Taiwanese nga si Yang Tong Yang kinsa maoy nakapalit sa kanhi tag-iya niini.

Matud pa ni SPO4 Lope Belsenia sa pakighinabi sa mga tigbalita nahulpa ang ilawom sa tunnel alas 9 sa buntag ug naugkat lang ang tulo pagka-ala una na sa hapon gumikan sa tabang ra usab sa mga molupyo.

Gikatahong gihikay hinuon sa tagdumala sa maong minahan ang mga biktima aron kahatagan og tabang samtang gisubay na karon sa kapolisan kun unsay posibleng tulubagon sa nag-operate niini.- Edwin Ian Melecio uban sa report ni Wen Celen