3 luhong awto wa matugyan

Nagpabilin nga wala ikatugyan ngadto sa Bureau of Customs ang mga nasakmit nga tulo ka luhong right hand drive nga sakyanan.

Si Mandaue City Police Director Pablo Florante Lamosao Jr. miingon nga ilang gipaabot nga si Cebu Customs District Collector Ma. Lourdes Mangaoang nga mohimo og personal nga pag-inspeksiyon sa 40-footer container van nga dunay tulo ka Mitsubishi Delica nga pulos right-hand drive.

Dugang pa ni Lamosao nga andam usab silang moatubang sa Ombudsman Visayas kun may kaso man nga isang-at batok kanila tungod sa ilang gihimong pagsakmit sa maong mga sakyanan.

Subli nga gipasabot ni Lamosao nga igo lamang gayod silang nagtuman sa ilang trabaho nga pagtubag sa alarma dihang nadawat nila ang taho labot sa gikawat nga container van nga adunay sulod nga kargamento.

Pinaagi sa search warrant nga giisyu ni RTC Judge Ulric Cañete ilang napahigayon ang pag-abli niini ug nahingangha na lamang sila nga tulo ka luhong right hand drive nga sakyanan ang sulod niini.