Bana nakigdulog og biyuda naabtan ni misis

Naabtan gayod sa akto sa asawa ug sa kuyog niining polis ug mga kawani sa Department of Social Welfare and Development (DSWD) ang iyang bana nga hubo samtang nakigdulog sa biyuda niining kabit nga maoy hinungdan nga gidakop ug gipriso.

Nahitabo kini alas 2 pasado ang takna sa hapon niadtong miaging adlaw didto sa gipuy-ang panimalay sa magtiayon nga nahimutang sa Basubas Compound sa barangay Tipolo, siyudad sa Mandaue.

Si Salvador, 36, minyo nga nagpuyo sa maong dapit ang nagtingkagol karon sa detention cell sa Presinto 2 sa Subangdaku Police Station sa maong dakbayan.

Ang biyuda niining hinigugma nga si Violita, 24, nga lumad nga taga Fatima, Ubay, Bohol ang lakip usab sa gidakop apan pipila ka takna nga pagtanggong gipabuhian human moluwat og kamandoan ang korte.

Si Julieta, 37, minyo nga nagpuyo usab sa maong dapit ug asawa sa suspetsado nga si Salvador maoy mipasaka og kaso nga concubinage ngadto sa korte ug girekomendar ang P10,000 nga piyansa alang sa temporaryong kagawasan.

Sa pagpakighinabi sa Banat News kang SPO4 Raul Noynay sa kapolisan sa maong dakbayan kini miingon nga si Julieta ang unang midangop sa pagpangayog panabang sa buhatan sa Department of Social Welfare and Development (DSWD) kinsa mireklamo nga kanunay lamang kining mabiktima sa pagpangulata.

Ang mga tinugyanan sa DSWD nga sila si Mila Cavan ug Raymund Cahayagan maoy kuyog niini sa pagpakuyog usab og mga polis ngadto sa ilang panimalay sa nahisgotang lugar.

Sa ilang paghidangat sa maong lugar maoy gihimo sa asawa ang pag-abli sa pultahan ug kuyog usab sila sa pagsaka ug hangtod na sa pagsulod sa lawak diin didto usab ang bana ug ang babaye nga naghubo ug nagdali sa pagsul-ob sa ilang sapot ug naglumba sa pagpanggawas.