Naghikog

Ormoc City - Usa ka trabahante sa Philippine National Oil Company ang gikataho nga naghikog pinaagi sa paglukso gikan sa electric transformer sa usa ka hotel ning dakbayan sa miaging Sabado.

Ang kapolisan ning dakbayan miila sa namatay nga usa ka Felipe Buscano,39 anyos, minyo og lineman sa PNOC og kasamtangan nga nagpuyo sa barangay Milagro ning dakbayan.

Gituohan nga ang grabeng kaguol sa biktima gumikan sa kamatayon sa iyang asawa human makasugat og aksidente ingon man miangol usab sa iyang duha ka anak maoy hinungdan sa pagpakamatay sa biktima.

Pipila ka mga saksi miingon nga ang biktima unang nakit-an nga naglakaw duol sa usa ka hotel ning dakbayan.

Pipila ka gutlo gihubo niini ang gisul-ob nga sinina dayon saka sa usa ka poste.

Ang mga nakasaksi miingon nga kalit lang milukso ang biktima gikan sa poste nga iyang gisak-an.

Matud pa nasunog ang bahin sa lawas sa biktima gumikan sa linya sa kuryente nga naputol.

Milanat usab og 15 minutos una pa ang kabomberohan makahimo sa pagputol sa linya sa elektrisidad.

Niadtong Sabado sa buntag nakasugat og aksidente ang asawa sa biktima nga si Elena Buscano hinungdan sa kamatayon niini.

Naangol usab ang ilang duha ka mga anak gumikan sa maong aksidente. - Pepe Sollano uban sa report ni Roberto C. Dejon