Sa maong ronda kagahapon sa kaadlawon tulo sa mga gidudahang drug pushers ang nangasikop ug giilang sila si Demosthenes Bontuyan, Cresilda Miñoza ug Arestone Bontuyan pulos mga hingkod ang panuigon ug molupyo sa maong dapit, samtang nakaipsot sa kapolisan ang laing gituohang drug pusher nga si Joseph Velasquez.
Ang mga sakop sa Criminal Investigation and Intelligence Branch pinanguluhan ni Supt.Pablo Labra III armado sa search warrant nga giluwatan ni RTC Branch 13 Judge Menrado Paredes batok sa upat ka suspek.
Nakuha gikan sa managparyenteng Bontuyan mao ang 13 ka medium size nga may sulod nga gidudahang shabu, 20 ka paketeng may sulod nga shabu ug mga gamit pagsuyop.
Samtang kang Miñoza nakuhaan kini og pito ka medium size nga paketeng may sulod nga gidudahang shabu, lakip sa nakuhaan og shabu mao ang panimalay sa nakaipsot nga si Velasquez nga 6 ka gagmayng pakete ug 4 ka medium size nga may sulod nga gidudahang shabu ug mga himan pagrepak niini.
Ang Sitio Dita maoy nabansagan sa kapolisan kaniadto og "little Pasil" gumikan sa kadaghan sa mga namuyong mga drug pushers nga maoy giingong nagsuplay sa mga drogas sa mga drayber sa habal-habal nga nagbiyahian sa bukirang barangay sa dakbayan.
Sa laing bahin, nadakpan sa kapolisan sa Lapu-Lapu ang giilang dangog nga pusher sa Isla sa Olango atol sa ronda kagahapon.
Si Ulysses Suelo Gilig, 35, nagpuyo sa Barangay Sta. Rosa sa maong isla, nasakmitan og 11 ka paketeng shabu atol sa ronda sa Philippine Drug Enforcement Agency-7 pinaagi sa search warrant nga giisyo ni RTC Judge Jesus dela Peña. Gisaksihan ang ronda sa mga opisyal ug tanod sa maong barangay.