Post office sa CH papahawaon na

Nagproblema karon ang Philippine Postal Corporation alang sa kabalhinan sa ilang sangang post office nga nahimutang sa Cebu City Hall human nakadesisyon ang kagamhanan sa siyudad sa Sugbo nga papahawa-on na kini sa lugar nga maoy ila karung gi-okupahan.

Gipasabot ni City Administrator Francisco Fernandez nga obligadong mopahawa ang maong post office nga nahimutang sa ground floor sa karaang City Hall Building tungod sa ipahigayon nga pag-renovate sa maong edipisyo.

Matud ni Fernandez nga bisan makumpleto na ang renovation sa karaang City Hall nga pagatawgon na unya ug Legislative Building dili na gihapon tugutang makabalik ug opisina sa maong buhatan bisan ang uban pang mga ahensiya.

Mipasar og resolusyon si Konsehal Edgardo Labella nga gitakdang diskuti-on atol sa sesiyon karung hapon nga naghangyo sa mga kaubanan niini sa konseho nga ipabilin ang nahisgutang post office.

Apan alang kang Fernandez wala na kinahanglana ang maong post office gumikan kay gawas nga duol lang kini sa post office sa may Aduana duna usay daghang mga sakyanan sama sa 50 ka gi-abangang multicab ang siyudad nga magamit sa pagpaabot og komunikasiyon ngadto sa kabarangayan matag adlaw.

Nabutang ang maong sangang buhatan sa post office diha sa City Hall niadto pang tuig 1980 sa panahon pa ni kanhi Mayor Florentino Solon.