Kawani sa CH miapil og rally imbestigaron

Andam atubangon sa kawani sa Cebu City Hall ang gilaraw nga imbestigasyon batok kaniya human masakpi nga mitambong og rally atol sa oras ting trabaho niadtong milabay'ng Biyernes.

Ang kanhi Secretary General sa Akbayan Allan Mar Catulinan nga karon kawani sa City Hall ug kasamtangang nadestino sa Squatters Prevention Encroachment and Elimination Division (SPEED) miangkon nga aktibo siya og sagad siya pa ang mag-emcee sa matag rally nga himoon sa ilang pundok.

Apan giklaro niya nga ni-file siya og leave of absence atol sa pagtambong niya sa rally niadtong Biyernes.

Nasayran nga gitinguha ni Konsehal Augustus Pe nga maimbestigar ang maong kawani sa City Hall nga nagsul-ob pa og I.D. nga mitambong sa rally sa may Gaisano Metro niadtong Biyernes nga gitumong sa panawagan pagpa-resign sa puwesto ni Presidente Gloria Arroyo.

Gitug-an ni Catulinan sa Banat News nga wala siya motagam pagtambong sa maong rally og giangkon sab niya nga personal niyang desisyon og baruganan ang pagsuporta sa panawagan pagpa-resign sa pwesto ni presidente Arroyo.

Matud ni Catulinan gipaabot niya ang memorandom sa laraw nga imbestigasyon batok niya aron iya kining tubagon.

Gani niadtong milabay'ng Hunyo 30 nga rally nahibaw-an sab nga si Catulinan sab ang nag-emcee sa protesta sa mga militanteng pundok nga gipasiugdahan sa Laban ng Masa nga gihimo sa Colon sa atubangan sa Metro Gaisano.



Si Catulinan nagsugod kini og serbisyo sa Cebu City Hall niadtong Disyembre tuig 2001 ug unang nadestino sa Department for the Welfare of the Urban Poor (DWUP) ug nagsilbi usab siyang Secretary General sa Akbayan gikan tuig 2001 hangtod na niadtong milabay'ng bulan dihang nagpili og bag-ong mga opisyal ang maong pundok.