Katapusang SONA?

Gipanglantawang katapusan nang State of the Nation Address (SONA) ni Presidente Gloria Arroyo ang iyang ipamahayag karong adlawa atubangan sa Joint Session sa Kongreso.

Kini maoy mahimong labing unang higayon nga walay bisan usa ka senador gikan sa oposisyon diha sa Senate Panel nga mopahibalo andam na ang Senado ug House of Representative nga maminaw sa iyang pamahayag sa Joint Session.

Kini usab ang unang higayon nga mohatag ang presidente og SONA madungan sad sa pagsugod sa proseso sa iyang impeachment .

Si Senate Minority Leader Aquilino Pimentel Jr. namahayag nang daan nga dili motambong sa SONA ang oposisyon isip pagpakita sa ilang hugot nga disgusto sa presidente nga ilang gipasanginlang sa una palang daan nanikas na sa katawhan.

Matud pa ni Pimentel dili maako sa ilang pundok nga paminawon ang lain na usab nga mga bakak ug mga rason gikan sa pangulo aron lang matabunan ang mga sala niini sa katawhan.

Dunay mga impormasyon nga dunay mga kongresistang miyembro sa oposisyon nga mo-walkout atol mismo samtang namahayag si Arroyo sa iyang SONA.

Si Senador Miriam Santiago nagkanayon nga kun mahitabo kini, kini maoy unang higayon nga dunay laing tawong mouna pa og biya sa sesyon gawas sa Presidente sanglit sa naandang pamaagi ang pangulo gyud ang unang mobiya.

Giisip kini ni Santiago nga pagpakita og kawalay batasan ug insulto sa posisyon sa usa ka Pangulo sa nasud.

"I hope they will avoid this (walkout) for the sake of good manners, To boycott would be sufficient to express disapproval. But to walkout would be rude not only to the President but to the institution of the presidency," asoy pa ni Santiago sa mga sakop sa media .