Mga bata apil sa rally kuhaon sa city hall

Mga batang makit-ang giuban sa mga ginikanan sa mga rally karong adlawa kuhaon gyud sa kagamhanan sa Sugbo aron masigurong dili mameligro, sumala pa ni Konsehal Gerry Carillo.

Si Carillo kinsa maoy tsirman sa Social Services Committee sa konseho ning dakbayan sa Sugbo sa usa ka interbyu sa lokal nga sibyaanan nagkanayon nga kun dunay mga batang makit-ang naa sa pundok sa mga raliyista ipakuha gyud kini sa mga sakop sa Social Services aron dad-on sa Department of Social Welfare and Development .

Sigun pa ni Carillo kun dili motugot ang mga ginikanan o di ba kaha mga hamtong nga nagdala sa mga bata magpatabang sila sa mga polis aron makuha lang gyud ang mga bata o di ba kaha pakuyugon ang mga ginikanan niini sa DSWD aron lang dili gyud maapil sa rally nga posibleng mosangpot sa kagubot.

Niadtong milabayng rally diha atubangan sa Malacañang sa Sugbo dunay mga batang naapil nga sa kagubot dihang miatraka ang mga nagprotesta sa laray sa mga polis nga misangpot sa paggamit og bomba sa tubig ug teargas.