Tulisan nasikop atol sa hot pursuit sa polis

Wala kaugpo ang usa ka gidudahang tulisan pipila ka oras human sila makapanulis dihang miabot ang mga polis nga nagpahigayon og hot pursuit operation diha sa dalan T.Padilla Extension Barangay Tejero ning dakbayan diin kini magtago kagahapon sa buntag.

Ang nadakpan giilang si Darwin Mondejar,24, taga Sitio Villagonzalo Dos Barangay Tejero ning dakbayan samtang gipangita pa ang mga duha ka mga kaubanan niini nga nakasibat.

Ang suspek positibong giila sa mga biktimang giingong gitulis diha sa sulod sa usa ka PUJ nga padulong sa SM Department Store kagahapon sa buntag.

Ang mga biktima giilang sila si Modesto Saagando,32, taga Barangay Tejero ning dakbayan kinsa nakuhaan sa iyang 3315 nga cellphone, Edelberto Medrano, 24, taga Sitio Tondan Basak dakbayan sa Mandaue kinsa nakuhaan usab sa iyang 3510 cellphone.

Gikatahong ang mga suspek miluwan usab sa maong PUJ dihang kalit lang silang gipangtiunan og kutsilyo sa tulo dayong kuha sa ilang mga cellphone.

Ang drayber nga si Ronaldo Canda maoy daling misutoy ngadto sa buhatan sa Mobile Patrol Group hinungdan sa nahitabong operasyon ug pagkasikop kang Mondejar diha ra sa maong dapit.

Si Mondejar mihimakak sa pasangil kay matud pa niya didto siya sa McArthur Boulevard dihang mahitabo ang tulis ug kasamtangang mitabang sa iyang higalang babaye sa pagsag-ob og tubig.