Pahimangno sa katawhan batok dautan gipadayon

Gipadayon ni Mandaue City Police Director Senior Superintendent Pablo Florante Lamosao ang mga pagpahimangno sa katawhan sa pagpakighiusa sa pagbantay batok sa pundok sa mga dautan sa katilingban.

Mao kini iyang gipadayag bisan sa hingpit na nga pagkabungkag sa grupo sa duha ka mga banggiitang tulisan nga sila si Rey Torres ug Danny Limotan nga nagtingkagol na karon sa sulod sa selda sa bilanggoan.

Matud pa ni Lamosao nga ang pagkasikop nila ni Torres, Limotan ug sa tulo pa ka lain niining mga kauban ang nakahatag gayod og dakong kasulbaran sa mga nahitabong pagpanulis dinhi sa Sugbo sanglit nakuhaan na man ang mga dautan sa katilingban.

Gitataw ni Lamosao nga bisan sa pagkasikop sa maong pundok sa mga tulisan ang katawhan dili gihapon angay mokumpiyansa aron kalikayan nga adunay mabiktima sa mga pagpanulis.

Dugang pa ni Lamosao nga nagpadayon karon ang ilang pag-evaluate sa mga kaso nga ilang gipasaka ngadto sa korte batok nila ni Torres og Limotan kinsa mao usab kini ang mga mitumaw nga mga suspetsado.

Naglakip sa kaso nga ilang napasaka sa maong lider sa mga tulisan ang robbery with homicide ug uban pa ug ang korte may mga warrant of arrest usab nga giluwatan niini.