Mokabat P1 milyon danyos sunog sa Mandaue

Mokabat gayod P1 milyon nga kantidad ang danyos sa nasunog nga panimalay sa usa ka Chinese Filipino businessman ug miangol kini sa usa ka tawo kinsa mitabang sa paghimo og pasiunang pagpawong sa kalayo.

Ang nasunog mao ang panimalay ni James Uy nga mao usab ang tag-iya sa Pro Food Corporation nga nahimutang usab sa sulod sa compound sa nahisgotang establisamento sa Sudlon, Maguikay, siyudad sa Mandaue.

Si Ulrich Nasser, hingkod ang panuigon, minyo nga nagpuyo usab sa maong dapit ang dali nga gihatod sa tambalanan ang nakabaton gayod og mga paso sa iyang kalawasan kinsa kauban sa pipila niini ka mga silingan maoy unang nahidangat sa maong dapit sa pagtinabangay og pawong.

Si SF02 Roy Garcia, imbestigador sa kabomberohan sa maong dakbayan nga gikahinabi sa Banat News ang miingon nga ilang nadawat ang alarma sa ilang buhatan alas 3:50 ang takna sa miaging kaadlawon ug hingpit gayod nilang nakontrolar ang kalayo sa paglabay sa 10 minutos nga gidugayon sa ilang pagpawong.

Matud pa ni Garcia nga si Mandaue City Fire Marshall Oscar Mayol nga maoy nangulo sa pagtubag sa maong alarma ang mipaubos sa maong sunog sa second alarm sa paghatag og kahigayonan sa uban pang kuwerpo sa pagtabang og pawong sa kalayo.

Dugang pa ni Garcia nga sa iyang pasiunang imbestigasyon maoy mitumaw nga ang kalayo unang nagsugod sa kisame sa annex building sa residential house sa maong negosyante nga maoy nakaingon sa hingpit gayod nga pagkaugdaw niini.

Sumala pa niya nga gisugdan na unta sa pagkaon sa kalayo ang second floor ug third floor sa panimalay sa maong negosyante apan dali kining natabang sa kabomberohan sa maong siyudad.

Giklaro usab niya nga nagpadayon pa ang ilang pakisusi sa maong insidente ug wala gayod niya matataw ang hinungdan sa kalit nga pag-ulbo sa kalayo.