PSG andam modepensa Malacañang-Cebu

Hingpit na nga nakapangandam ang Presidential Security Group (PSG) alang sa paghatag og tukmang siguridad sa palibot sa Malakanyang dinhi sa Sugbo atol sa State of the Nation Address (SONA) ni Presidente Gloria Macapagal Arroyo nga gikatakda ugma Lunes, Hulyo 25.

Mao kini ang nasayran gikan kang Captain Tomas Domenic Baluga sa 3rd Guard Company sa PSG nga gikahinabi sa mga tigbalita niadtong miaging adlaw.

Matud pa ni Capt. Baluga nga ubos sa 3rd Guard Company ang idugang nga upat pa gayod ka platoon sa mga sundalo nga gikan sa Central Command ug lain pa gayod nga mga augmentation force sa PNP ang tahasan sa pagbantay niini.

Dugang pa ni Capt. Baluga nga gawas sa higpit nga pagbantay maoy ilang gihimo ang pagpalig-on pa sa mga barikada sa palibot sa Malakanyang sa Sugbo aron pagbabag sa mga raliyista.

Ang mga barbed wire kaniadto giilisan na og puthaw nga gidugangan pa sa pagpalig-on pinaagi sa pagsemento sa gibutangang pundasyon niini nga kapugngan sa pagsulod sa tugkaran sa Malakanyang ang mga raliyesta.

Hinuon si Captain Baluga nanghinaut nga maoy ipatigbabaw sa mga demonstrador ang kabugnaw sa ulo alang sa pagpasupot sa ilang mga sentimento sanglit walay magdili niini kanila.