Nobelista kit-an nga patay na

Inilang nobelista ug magsusuwat sa mga binisayang sugilanon napalgang patay diha sa iyang lawak niadtong milabay'ng adlaw diha sa ikaduhang andana sa iyang ancestral home sa dalan M.J. Cuenco Barangay T.Villa ning dakbayan, anggulo sa paghikog maoy gidudahan sa kapolisan karon.

Napalgang patay mao si Franklin Villa, ang nabantog nga Frank Villa, kanhi manunuwat dinhi sa Banat News og mga sugilanon.

Ang biktima gikatahong ulahing nakit-ang buhi sa iyang pag-umangkon nga si Joselito Villa niadto pang Domingo sa gabii samtang kini nagmulo sa kasakit sa iyang dunggan.

Gikatahong naandan na sa iyang mga kabanay ang pag-inusara ni Villa, gani dili man gani kini mopahibalo kun molarga ngadto sa Mindanao.

Apan niadtong milabay'ng adlaw ang langsa kaayong baho ang nagtultol sa katabang sa mga Villa nga si Rosendo Cañedo kinsa misubay didto sa lawak sa biktima.

Ang kapolisan nakakita og usa ka litrong muriatic acid, usa ka icepick ug usa ka kutsilyo diha sa tupad sa patay'ng lawas sa biktima nga nagsugod na og kalata.

Walay nakitang timailhan nga pugsanong gisulod ang lawak niini ug ingon man foul play sa lawas niini.