2 batalyon para sa rally

Dugang duha ka batalyon sa mga polis ug kasundaluhan ang ipakatap unya sa mga dapit diin himuon ang mga rally karong umaabot nga adlaw'ng Lunes dinhi sa Sugbo atol sa State Of the Nation Address (SONA) ni Presidente Gloria Arroyo didto sa kauluhan.

Si Supt. Melvin Gayotin ang Acting Cebu City Police Director mitug-an sa Banat News nga nunot sa nahitabong insidente sa karambola tali sa mga polis ug mga raliyista niadtong milabay'ng semana gikinahanglan na gyud ang dugang palig-on sa pwersa sa security forces sa palibot.

Ang maong dugang seguridad gikan sa Regional Mobile Group (RMG) ug sa Central Command gawas pa sa mga sakop sa CCPO nga ipakatap usab .

Gipaabot nga posibleng dunay mahitabong kasamok ang mga kalihukan gumikan usab sa mga nangabot nga impormasyon sa kapolisan nga dunay mga sakop sa mga rebeldeng New Peoples Army ang mosalmot sa mga protesta sa kadalanan.

Dunay dili kompirmadong report ang nadawat sa kapolisan nga dunay mga tawong gikan pa sa Isla sa Negros ang midunggo sa mga lungsod sa Balamban ug Asturias nga gidudahang mga sakop sa NPA nga mosalmot karong Lunes sa kalihukan sa karsada.

Hinuon si Supt. Pablo Labra mibutyag nga tanang pwersa sa CCPO ang dugang sa AFP ug RMG ibutang gyud daan sa mga dapit isip crowd control unit gumikan sa gipaabot nga daghang mosalmot protesta batok kang Arroyo.

"Anticipated na namong daan nga dunay mga tawong gikan sa pikas (NPA) ang mosamok sa mga rallies,"asoy pa ni Labra sa mga tigbalita.

Si Arroyo giprotestahan gumikan sa pasangil nga nanikas kini niadtong piniliay ilabi na dinhi sa Sugbo diin usa ka Sugbuanong senador nga kanhi kauban sa K4 Coalition ni Arroyo nga si Sonny Osmeña nangangkong duna siyay ebidensya nga nagmatuod nga si Arroyo nanikas og kapin 400 mil botos dinhi lang sa lalawigan.