TRS giunay sa sulugoon

Buhatan sa Theft and Robbery Section sa Cebu City Police Office wala pasayloa sa mga kawatan dihang mismong ang ilang evidence room gikawatan sa ila rang striker kun suluguon niadtong milabay'ng Huwebes sa hapon.

Hinuon wala makaugpo ang duha ka mga suspetsadong sila si Tadeo Camacho,20, kinsa striker sa TRS ug mao usahay ang mangompone sa mga sakyanan sa mga polis diha sa CCPO, ug kauban niining si Alberto Colina,31, ulitawo, taga Sitio Itom Yuta, Barangay Lorega San Miguel ning dakbayan.

Sigun pa sa imbestigasyon sa TRS ang mga suspetsado naaktuhan mismo ni PO3 Jeoffrey Diola nga nagbitbit sa duha ka alloy rims sa ligid nga diha gihipos sa evidence room.

Nasutang ang duha diha mangagi sa luyong bahin sa maong lawak ug adto mokatkat sa gamay'ng lihang nga kaagian og tawo ug diha usab iagi ang mga kinuhang mga butang sa sulod nga mao ang mga ebidensya.

Sa pagsusi ni Diola sa maong lawak nasutang 32 na diay ka mga alloy rims ang nangawala nga nagkantidad og P160 mil, gituohang ang ubang mga nawala gihinay-hinayan lang og paggawas sa mga suspek ug gibaligya sa mga interesado.

Kasamtangan karong gisubay sa TRS kun diin gipamaligya sa duruha ang ubang mga nangawalang ebidensya ug posibleng mapasakaan og kasong kalapasan sa anti-fencing act ang si bisan kinsang mahibaw-ang mipalit niini.

Ang duruha kasamtangang gitanggong karon sa Bagong Buhay Rehabilitation Center.