Antingang mamumuno nadakpan

Mokapin na sa 10 ka tawo ang "gibirahan" patay ni Roland Fuentes ang numero unong kriminal sa Dumanjug nga nadakpan niadtong Martes sa buntag sa Banilad, Cebu City.

Gikonpirmar kini ni SPO1 Carlito Abella, desk officer sa Dumanjug Police Station sa pakighinabi sa Banat News kagahapon sa buntag.

Matud pa ni Abella nga idlas ug dangog lang kaayo si Fuentes hinungdan nga dugay kaayong nadakpan.

Gani gidudahan usab nga may anting-anting ang maong suspetsado tungod kay matag higayong makapatay kini sa Dumanjug mawala lang dayon ug lisod kaayong pangitaon.

Nagduda usab ang uban nga usa ka "hired killer" kining maong tawo kay hanas ug batid man kaayong mopatay og tawo.

Ang pagpatay niini kang PO2 Agapito Aranas, niadtong Mayo 15, 2004 gidudahan nga gibaligya lang ang maong biktimang polis ngadto kang Fuentes.

Kini tungod kay way panagbangi si Fuentes ug Aranas nga mao untay angayang basihan nga masuko ang nahauna batok sa biktima.

Naigo sa lima ka mga bala sa armas si Aranas dihang gibanhigan kini sa dalan pauli na sa ilaha niadtong fiesta sa Barangay Kabalaasnan, Dumanjug human mamadlong sa mamistahay nga nag-away sa maong lugar.

Human niadto motungha lang og makadiyot si Fuentes sa lungsod unya mawagtang lang dayon hinungdan nga wala gayuy higayon ang kapolisan sa pagdakop kaniya.

Niadtong Martes alas 7:00 sa buntag maayo lang kaayong pagka-"info"-kanilang mga polis ang bahin sa nahimutangan ni Fuentes sa Banilad.

Giisip ni Abella nga A-1 kaayo ang impormasyon nga ilang nadawat hinungdan nga wala na kaipsot si Fuentes kanila.

Si Fuentes, 28, ulitawo nga taga barangay Apo, Dumanjug dugay nang may warrant of arrest.