Tan gidugok sa mga tawo

Gidugokan sa katawhan ang giilang dakong lider sa nabunggo nga mega shabu laboratory sa Umapad, dakbayan sa Mandaue kinsa nahidangat sa maong siyudad alas 9 pasado ang takna sa buntag kagahapon.

Si Calvin de Jesus Tan ang nahidangat kini sa maong dakbayan alang sa pagpaatubang kang Judge Marilyn Yap sa Branch 28 sa Regional Trial Court (RTC-7) kinsa maoy naghupot sa kaso uban sa 11 ka mga langyaw nga nadakpan sa pagronda sa nahisgotang pabrika sa shabu niadtong Septiyembre 24 sa miaging tuig.

Ang mga sakop sa Philippine Drug Enforcement Agency (PDEA-7), National Bureau of Investigation (NBI), Special Weapon and Tactic (SWAT) ug kapolisan maoy higpit nga mipatuman sa pagbantay alang sa paghatag og kasiguroan kang Tan.

Sila si Kongresista Antonio Cuenco nga maoy vice chairman sa committee on drugs sa Kongreso, PDEA-7 Director Amado Marquez ug mga kauban maoy kuyog sa pagpresentar ni Tan ngadto kang Judge Yap.

Si Judge Yap sa iyang commitment order ang mimando sa PDEA-7 ug sa mga kauban niining law enforcement unit sa pagtanggong kang Tan sa Cebu Provincial Detention and Rehabilitation Center (CPDRC) sa Kalunasan sa dakbayan sa Sugbo.

Kuyog ni Tan sa pagpresentar sa korte si Atty. William delos Santos nga maoy nagsilbing iyang abogado kinsa nangayo usab sa korte alang sa usa ka marathon hearing sa kaso sa iyang kliyente.

Giklaro ni delos Santos nga sa pasiuna niyang pagpakighinabi kang Tan maoy gitug-an niini ngadto kaniya nga ang pag-atubang sa korte sa kaso mao usab ang labing unang higayon niini ang pagduaw dinhi sa Sugbo.