Balota sa tersiro ipaukay ni Yapha

Ang ikatulong distrito sa lalawigan sa Sugbo andam nga moutingkay sa tanang balota niadtong miaging piniliay pagmatuod nga midaog gyud si Presidente Gloria Macapagal-Arroyo didto.

Mao kini ang baruganan ni Kongresista Antonio Yapha kinsa wala masayod kun unsay gibasehan ni kanhi Senador John Sonny Osmeña sa iyang nadiskobrehang deperensya sa mga botos nga nakuha ni Arroyo dinhi sa lalawigan.

Si Yapha kinsa suporter ug suod kaayo ni Osmeña nagkanayon nga siya makapamatuod nga sa iyang distrito wala gayuy nahitabong binuang sa resulta sa eleksyon niadtong tuig 2004.

Sama usab sa baruganan ni Kongresista Eduardo Gullas sa unang distrito, ug Simeon Kintanar sa ikaduhang distrito, kinsa pulos mipamatuod nga limpyo ang kadaugan ni Arroyo sa ilang tagsatagsa ka distrito.

Matud pa ni Yapha nga niining pagbulgar ni Osmeña sa iyang nasayran bahin sa giingong napildi sa katibuk-an si Arroyo, wala siya (Yapha) masayod kay wala sila magkasulti sulod na sa tulo ka semana.

Apan alang kang Yapha basin may kamatuorang nasayran si Osmeña bahin niini hinungdan nga agresibo siya sa iyang pamahayag.