71 ka parisan mitapos sa CLP sa Couples for Christ

Sa labing unang higayon dunay usa ka batch sa mga managtiayong misalmot sa Christian Life Program sa pundok sa Couples for Christ ang awtomatikong gihimong usa ka chapter gumikan sa kadaghan sa paresan nga mitapos niini.

Si Cebu City Market Administrator Elpidio Jojo dela Victoria mitug-an sa Banat News nga dunay 71 ka paresan nga managtiayon ang bag-uhay lang mitapos sa 13 ka Sabadong seminar sa Christian Life Program niadtong Hulyo 9.

Tungod sa gidak-on sa maong pundok ang Cluster Head sa CFC nga si Executive Judge Francisco Seville Jr. mideklarar nga himuon dayon kining usa ka tsapter ug ang managtiayong sila si Jojo ug Evelyn dela Victoria maoy gipiling Chapter Head sa 71 ka mga paresan.

Matud pa ni dela Victoria kini maoy labing dakong batch nga mipailawom sa CLP dinhi sa rehiyon ug posibleng bisan sa ubang parte sa nasud.

"Despite nga most of the time matag dunay CLP nga himuon dako na kaayo ang 25 ka paresan, pero karon daghan kaayo kay gihimo man gani dayong usa ka tsapter," asoy pa ni dela Victoria.

Ang Couples for Christ nga nagsugod sa Manila niadtong 1981, mosaulog usab sa ilang ika-15 ka tuig dinhi sa lalawigan sa Sugbo karong Sabado petsa 23 ug diha kini isaulog sa South Reclamation Project.

Niadtong Hulyo 2 sa 71 ka paresan nga miapil sa CLP, 37 ka paresan ang gikasal sanglit sila nagpuyo-puyo raman ug gikinahanglang kasadong managtiayon mao may usa sa mga rekisitos aron makaapil sa CFC.

Ang maong kalihukan sa CFC kabahin kini sa mga kalihukan alang sa umaabot nga ika-43 Founding Anniversary sa St.Joseph Parish sa Barangay Tabunok Talisay City, duna say ipahigayon nga laing mass wedding inig-abot na unya sa adlawng kasumaran karong Agosto 19,2005.