Pagrelibo ni Codilla gibabagan sa CH

Gibabagan sa mga opisyal sa siyudad sa Sugbo ang pagparelibo sa posisyon ni Cebu City Fire Marshal Supt. Esmael Codilla.

Pagkakaron si Codilla gitudlo kini pagka-assistant regional director sa Bureau of Fire Protection (BFP) human giparelibohan sa pagka city fire marshal.

Apan gibutyag ni Supt. Victoriano Remedio, regional director sa BFP-7 nga nitawag si acting Mayor Michael Rama human gisugo ni Mayor Tomas Osmeña, nga tua pa sa Netherlands, ngadto kang DILG Secretary Angelo Reyes ug mihangyo nga ipabalik pagka-city fire marshal si Codilla.

Apan gipasabot ni Remedio nga lisud ang buot mahitabo sa mayor gumikan sa bag-ong balaod sa R.A. 9263 kon professionalization law sa Bureau of Fire Protection and Bureau of Jail Management Penology.

Gipasabot ni Remedio nga wala silay problema kun ipabalik si Codilla pagka-city fire marshal gumikan kay masayon lang ang pag-isyo nila og direktiba apan ang ilang gika-problemahan ang maong balaod.

Kini tungod kay ubos ning maong balaod bugtong ang nagranggo lang og chief inspector ang matudlong city fire marshal apan tungod kay superintendent na ang ranggo ni Codilla gikinahanglan na kini nga ma-promote og destino ngadto sa Provincial Fire Department o sa nahimutangan niini karon sa BFP-7.

Mi-epekto ang gipatumang lahugay sa BFP niadtong petsa 8 ning bulana ug si Chief Insp. Rodelio Domaolao maoy bag-ong fire marshal sa siyudad sa Sugbo nga usa usab ka Sugboanon.

Kini maoy hinungdan sa gihimong pagpakigtagbo ni Remedio ngadto kang Rama kagahapon aron ipasabot ang bag-ong balaod nga niadto pang bulan sa Marso pormal nga na-implementar.