CIIB kadawat napud P100 mil

Makadawat og P100 mil nga ganti gikan sa kagamhanan sa siyudad sa Sugbo ang mga polis nga sakop sa Criminal Investigation and Intelligence Bureau (CIIB) nga maoy responsable sa pagkasikop sa laing notadong tulisan nga si Danny Limotan didto sa Purok 13 barangay Valencia, Bukidnon niadtong miaging adlaw.

Kini human giaprobahan ni Mayor Tomas Osmeña nga atua pa karon sa Netherlands ang rekomendasyon ni Konsehal Augustus Pe alang sa paghatag og ganti sa mga polis nga nakasikop kang Limotan nga gipangulohan ni CIIB chief Paul Labra.

Matud ni Pe gi-text dayon niya ang mayor human mapublikar ang pagkasikop ni Limotan niadtong milabay'ng adlaw dungan ang iyang rekomendasyon alang sa paghatag og ganti.

Gawas niini, mopasar usab og resolusyon ang konsehal atol sa sesyon sa konseho karong hapon nga magpasidungog sa mga operatiba sa CIIB nga nakasikop kang Limotan.

Si Limotan naila na kining kauban sa nasikop ug naputlan og tiil nga notadong tulisan nga si Rey Torres sa mga pagpanulis niini dinhi sa dakbayan niadtong milabay'ng mga bulan.