Pasangil ni Loren di tinuod

BOHOL - Gipanghimakak ni Gobernador Erico Aumentado ang pasangil ni kanhi senador Loren Legarda nga adunay nahitabong tikas sa piniliay ning probinsya nga mipabor ni Presidente Gloria Macapagal Arroyo ingon man ni Bise Presidente Noli de Castro.

Si Aumentado miingon nga walay igong basihanan ang giluwatan nga pasangil ni Legarda nga adunay tikas sa piniliay og ingon man pag-andam sa Election Returns sa usa lang ka tawo.

Matud pa ni Aumentado nga sa dagan sa piniliay ilabi na gayud sa gihimong ihap niini gibantayan gayud kini sa pikas og pikas nga habig.

Nalakip gani niini ang mga boluntaryo gikan sa simbahan ingon man sa pribadong sektor.

Midugang si Aumentado nga ang resulta diin nakakuha og dakong botos sila si Presidente Arroyo ingon man si Bise Presidente De Castro gumikan kay mao man kini ang tinud-anay nga sentimento sa katawhan.

Si Legarda misang-at karon og reklamo batok ni De Castro gumikan sa giingong tikas nga gihimo niini sa miaging piniliay.

Gawas sa Bohol gibutyag usab sa kanhi senador nga nakabantay sila sa lain usab nga kwestyonable nga Election Returns gikan sa dakbayan sa Mandaue og dakbayan sa Angeles sa probinsya sa Pampanga.