Nalzaro, Dumpit target ni Torres; Limotan mikanta

Ang banggiitang komentaristang si Bobby Nalzaro ug trigger cop nga si SPO1 Adonis Dumpit giplanuhan diay nga patyon sa grupo ni Rey Ruth "Roel" Torres kaniadto, kini maoy gikumpisal ni Eric Jay "Danny" Limotan sa Banat News kagahapon.

Si Limotan kinsa nasikop sa mga sakop sa Criminal Investigation and Intelligence Branch (CIIB) didto sa Purok 13 Barangay Poblacion Valencia City, Bukidnon niadtong Lunes sa hapon mibutyag nga kung wala pa siya mo-back-out sa mga plano ni Torres sa pagtipi nila ni Nalzaro ug Dumpit hayan napatay na gyud ang duruha.

Sumala pa ni Limotan nga niadtong ilang gitulis ang usa ka cellshop sa dakbayan sa Mandaue diin nakakuha sila og P7 mil ug usa ka bag nga mga cellphone nakadesider si Torres nga "tumbahon" si Nalzaro tungod kay gisabaan na kini sa pagpamira (komentaryo) sa komentarista.

Apan matud pa niya nga duna say panahon nga malingaw si Torres kang Nalzaro tungod sa estilo niini sa pagbira sa mga sakop sa kapolisan nga tawgon niinig "mga polis pulpol!"

"Adtong mipasiaw si sir Bob sa radyo nga mopalit kini og cellphone sa mga nanulis adtong cellshop sa Mandaue nalingaw siya (Torres) adto labi adtong gitawag ni sir Bob og mga pulpol ang mga polis pwerteng katawa niya, pero pagbira na ni sir Bob sa mga tulisan kalit lang niyang gipusdak ang radyo ni Junard Saladaga (usa sa mga miyembro sa grupo) dayong ingon siya namo nga sunod namong project-kan si Bobby kay banha ug alingugngug kaayo sa dunggan," asoy pa ni Limotan sa Banat News

Sigun pa ni Limotan nga wala gyud siya mosugot nga maoy mobira kang Nalzaro kay magduha-duha siya sa plano maong gipasa ni Torres ang pagpatay sa kauban nilang si Loloy Gamanay apan susama niya nagduha-duha usab hangtud nga nataligam-an nalang ang plano tungod usab sa kadaghan sa ilang giplanuhang tulison.

Samtang si Dumpit usab diriyot na nga "tumbahon" sa grupo ni Torres usa ka higayon niadtong milabay'ng tuig diha sa Fuente Osmeña rotunda samtang ang polis nagpalit og prutas duol sa gikan-an sa grupo nila Torres diha sa usa ka sikat nga fastfood chain.

Matud pa ni Limotan niadtong tungura dunay gikatagbong taga Mindanao si Torres sa maong dapit kalabot sa bag-o nilang target nga tulison apan dihang si Limotan maoy pamanehuon unta ni Torres sa motorsiklo nianang higayuna aron pagpatay kang Dumpit wala siya mosugot.

"Nahadlok man gud ko adto sir ni Dumpit kay tunog gud kaayo ang iyang pangalan basin kita unyay madisgrasya," tug-an pa ni Limotan sa Banat News.

Si Limotan maoy labing hanas sa pagmaneho og motorsiklo sa ilang grupo kun itandi sa ubang miyembro.