71 ka parisan nagpalista para sa mass wedding

Dul-an sa 71 ka parisan nga kaslonon nagpalista na para sa ipahigayon nga second batch sa mass wedding diha sa St. Joseph Parish sa barangay Tabunok dakbayan sa Talisay.

Ang nahisgotang mass wedding ipahigayon karong Agosto 19, sa alas 2:00 sa hapon. Ang maong kalihukan gipaluyohan kini sa grupo sa Couples for Christ ug tipik kini sa 43rd founding anniversary celebration sa St. Joseph parish.

Ang maong mga kaslonon mitambong og Christian Life Seminar Program (CLP) una sila ma-certified nga CFC member diin niadtong petsa nuybe niining buwana gipahigayon ang ilang graduation sa maong seminar.

Matud pa ni Elpedio "Jojo" dela Victoria Jr., CFC Tabunok chapter official nga ang maong CLP bukas sa tanang Christian couples.

Niadtong milabay'ng duha ka semana gipahigayon ang first batch sa mass wedding diin 37 ka magtiayon nga nagpuyo-puyo sa dugay na nga panahon ang gikasal.