Nikulata sa bata giluba

Gumikan sa pagpangulata ug pagdagmal sa usa ka bata nalubaan ang usa ka 60 anyos nga lalaki sa uyoan sa batang iyang gikulata diha sa Barangay Look dakbayan sa Danao niadtong nakalabay'ng gabii.

Talandugon ang kahimtang sa biktimang si Bernabe Mata, molupyo sa naasoyng dapit human kini bulita og dunggab sa suspetsadong si Ranulfo Maluloy-on, silingan niini.

Asoy pa ni SPO3 Edgar Gomez sa Banat News nasuko ang suspek dihang nahibaw-ang gisagpa ug gikulata sa biktima ang batang pag-umangkon niini sa way igong hinungdan.

Gikatahong nasagpaan ug nakulatahan sa biktima ang bata tungod kay napiskan siya sa tubig nga giinom sa bata gikan sa ice water nga gihuptan niini.

Sa kalagot sa suspek mikuha kini og gamayng pinote ug gisulong ang biktima dayong dunggab makadaghang higayon sa nagkadaiyang parte sa lawas niini hinungdan sa pagkalandig niini sa tambalanan.

Ang suspetsado malinawon dayong mitahan sa kapolisan human sa insidente.