Proyekto sa PTA ipadali paghuman

Bohol - Nanawagan karon si Gobernador Erico Aumentado sa kadagkoan sa Philippine Tourism Authority nga mapadali ang pagpagawas sa gahin aron magamit sa dinalian nga proyekto sa turismo sa tibuok probinsya ilabi na gayud sa isla sa Panglao.

Si Gobernador Aumentado miingon nga ang PTA mao karon ang gitahasan ni Presidente Gloria Macapagal -Arroyo sa pagpatuman sa programa niini diha sa Bohol.

Hinuon kini hingpit nga nakig-alayon sa buhatan ni Secretary Joseph Ace Durano sa Department of Tourism.

Matud pa ni Aumentado nga kinahanglan gayud nga dili sila magpabalda sa nanghitabo karon didto sa kaulohan.

Midugang si Aumentado nga kinahanglan gayud nga mapakita nila ang mga lider sa kaulohan nga padayon sila nga naningkamot alang sa kalamboan.

Usa niini dugang ni Gobernador Aumentado mao ang pagpatuman sa programa kabahin sa turismo.

Ang probinsya sa Bohol mao karon ang giila nga nag-una nga lugar nga giduaw karon sa mga turista.