Panaghiusa gipanalipdan

Bohol - Gipanalipdan ni Gobernador Erico Aumentado ang panaghiusa karon sa mga gobernador sa tibuok Kabisay-an pagplano og kalihukan nga dili na angayan magsalig sa kaulohan.

Si Gobernador Aumentado mipadayag niini human usab sa mitumaw karon nga tinguha nga magtukod og laing republika sa Kabisay-an.

Usa kini karon sa hulga sa mga gobernador sa higayon nga magmalampuson gayud ang habig sa oposisyon pagpalagpot ni Presidente Gloria Macapagol-Arroyo.

Dako hinuon ang pagsalig ni Gobernador Aumentado nga dili mapahawa si Presidente Arroyo sa katungdanan.

Subli nga gipahibawo ni Aumentado nga soledo gayud sila sa pagpaluyo ni Presidente Arroyo.

Midugang ang gobernador nga ang nanawagan ni Presidente Arroyo nga moluwat sa katungdanan dili mao ang tingog sa kinabag-an nga katawhan sa nasod.

Gipasabot ni Aumentado nga daghan pa gihapon ang misalig sa liderato ni Presidente Arroyo.